प्रॉब्लेम्स

              मी अशीच शनिवारी लक्ष्मी रोड वर फिरत होते .. फिरत असताना एक छोटीशी पाटी दिसली. जीवनात त्रासलेले आहात? आयुष्यात सुखी होण्याचे 101 उपाय ! संपर्क साधा "सुखिआयुष्य संस्था, लक्ष्मी रॊड, पुणे" .मी बघतच राहिले ... अरे आपले आयुष्य आहे; दुसरा माणूस आपल्याला काय मदत करणार? आणि महत्वाचे म्हणजे याची वेळच का यावी ?? खरं म्हणजे माणसाने नेहमी समाधानी आणि खुश राहायला हवे .. पण हे पुस्तकातले वाक्य झाले.. वास्तविक पाहता माणूस नुसता सुखाच्या मागे पळत असतो. आणि दुःखाचे आभाळ कोसळल्यासारखा वागत असतो.. आणि मलाच किती प्रॉब्लेम्स दिले आहेत देवाने असे कोचत बसलेला असतो..अर्थात याला माझाही अपवाद नाही..

             काही महिन्यांपूर्वीची  गोष्ट आहे, माझ्या आधीच्या कंपनी मधील एक सहकर्मचारी होता राहुल; तो सारखा अमेरिका पाठवा अमेरिका पाठवा म्हणून  मॅनेजर समोर रडायचा.अर्थात त्याची तशी चूक नव्हती. सॉफ्टवेअर कंपनी मध्ये असाल तर परदेशी जाणे गरजेचे असते. तुमच्यासाठी नाही तर आजूबाजूंच्यांसाठी !! कारण तुम्हाला कंपनीमध्ये २ वर्ष पूर्ण झाली कि ,मग दूरचा मामा ,आतेभाऊ विचारतात मग काय कधी पाठवणर तुला अमेरिकेला ? असो त्या राहुलला मॅनेजर ने एकदाचे अमेरिका पाठवले आणि ते पण  चक्क ६ महिन्यांसाठी !! त्याला तिथे जाऊन २ महिने झाले न झाले तोच त्याचा मला मेसेज आला कि मला इथे फार बोर होत आहे  एकट्याला; परत तिकडे यावे वाटत आहे .. अरे मी म्हणलं आधी पाठवत नव्हते म्हणून रडायचा आणि आता तिथे बोर होतेय म्हणून रडतोय .. असे वाटले कि त्याला म्हणावे अरे हा खूप शुल्लक प्रॉब्लेम आहे .. बाहेर जरा डोळसपणे बघ म्हणजे कळेल कि किती आणि कसे प्रॉब्लेम्स असतात लोकांना..

            आम्ही इंजिनीरिंग मध्ये असल्याची गोष्ट आहे.. आम्ही एका क्लब तर्फे मुक बधिर शाळेला भेट दिली होती.त्यांच्यासाठी चित्रकला स्पर्धेचे आयोजन केले होते.. आम्हाला पाहून मुलं खूप खुश दिसत होती.. एवढ्या लहान लहान मुलांनी इतकी सुंदर आणि  मनमोहक चित्र काढली हे बघून आम्ही आश्चर्यचकित झालो.. देवाने जरी त्यांना ऐकायची आणि  बोलायची क्षमता दिली नसली, तरी हातामध्ये सुंदर कला दिली आहे  ...आणि सर्वात महत्वाचे म्हणजे ती मुलं त्यांच्याकडे नसलेल्या गोष्टींवर रडण्यापेक्षा असलेल्या गोष्टींचा पुरेपूर आनंद घेत होते.. त्यांच्याकडे बघून आपल्याकडे खूप काही आहे आणि तरी आपण रडत असतो याची जाणीव मला झाली ..आणि ती छोटीशी चिमुरडी पोरं आयुष्याचा धडा शिकवून गेली..